ភ្នំពេញ៖ នាយករដ្ឋមន្ត្រីកម្ពុជាសម្ដេចតេជោ ហ៊ុន សែន បញ្ជាទៅកាន់ខេត្តទាំង៦ នៅជុំវិញបឹងទន្លេសាប បង្កើនការទប់ស្កាត់ការកាប់បំផ្លាញនិងទន្ទ្រានដីព្រៃលិចទឹកនៅជុំវិញបឹងទន្លេសាប ឱ្យបានជាប់លាប់បន្ទាប់ពីបើកយុទ្ធនាការយកដឹពីអ្នកទន្ទ្រានយកជាង៤ខែមកនេះ។

ការបញ្ជារបស់សម្ដេចធ្វើឡើងក្នុងក្នុងពិធីបិទសន្និបាតបូកសរុបការងារឆ្នាំ២០២១ របស់ក្រសួងកសិកម្ម រុក្ខាប្រមាញ់ និងនេសាទ នៅថ្ងៃពុធ ទី២៣ ខែមីនា ឆ្នាំ២០២២នេះ។

សម្ដេចបន្តថា៖ «តើអស់លោកធ្វើចៅហ្វាយខេត្តជុំវិញបឹងទន្លេសាបហ្នឹងគេធ្វើអីគេ បានជាបណ្ដោយឱ្យប្រជាជនចុះកាប់ព្រៃនៅក្នុងព្រៃលិចទឹកចេះតែបន្តគ្មានពេលឈប់»។

សម្ដេចបន្តទៀតថា ចំពោះក្រសួងចំនួនបីដែលទទួលបន្ទុកខាងផ្នែកព្រៃលិចទឹករួមមាន ក្រសួងកសិកម្ម ក្រសួងធនធានទឹក និងក្រសួងបរិស្ថាន ត្រូវរឹបអូសយកដីដែលប្រជាពលរដ្ឋទន្ទ្រានយកជាបន្ទាន់ ព្រមទាំងចាត់វិធានការតាមផ្លូវច្បាប់ដល់ជនល្មើសទាំងនោះ ដើម្បីថែរក្សាផ្ទៃបឹងជាប្រយោជន៍រួមសម្រាប់ប្រទេសជាតិ។

គួរឱ្យដឹងដែរថា រហូតមកដល់ថ្ងៃទី១០ ខែមីនា ឆ្នាំ២០២២ ប្រជាពលរដ្ឋរស់នៅខេត្តទាំង៦ ជុំវិញបឹងទន្លេសាប ស្ម័គ្រចិត្តប្រគល់ដីជូនរដ្ឋវិញចំនួន ១៥ ០០២គ្រួសារ ស្មើ ៦៣ ១៩០,៨០ហិកតា និងធ្វើការវាស់វែងជាក់ស្តែងបានចំនួន ៨ ៨៦០គ្រួសារ ស្មើ ១០ ៨៣៧ក្បាលដី និងមានទំហំ ៨៧ ០៤២,៤៥ហិកតា៕